Igandean, Getxoko Andra Mari probalekuan Urrezko Aizkolariak lehiaketaren lehen finalerdia jokatuko da. Maila nagusian eta gazteen mailan. 12:15etan hasiko den jaialdian, Donato Larretxea eta Aitzol Atutxa, Floren Nazabal eta Ugaitz Mugertzaren aurka lehiatuko dira. Maila handiko saioa ikusi ahal izango da, askoren esanetan final aurreratua izango delarik.

Orain artekoa ikusita, Nazabal eta Mugertza izan daitezke faborito, baina behin finalerdietara iritsita, edozer gerta daitekeela garbi dago.

Gazteei dagokienez, Ohian eta Garikoitz Larretxea, Julen Cañamares eta Jon Rodriguezen aurka ariko dira. Jaialdi berearen barruan, Inaxio Perurenak errekor saiakera egingo du: esku bakar batez 230 kiloko harria jasotzen saiatuko da leitzarra. Bere ohiko bidea jarraitzen du Perurenak, bost kilo gehituz bere marka onenari.