Lourdes Fernándezek, Arco Arte Garaikidearen Nazioarteko Azokaren zuzendariak, emakumeen nazioarteko egunari buruzko hitzaldi bat eman zuen martxoaren zortzian Donostiako Londres Hotelean. Ekonomisten Euskal Elkargoak antolatutako konferentzian, gonbidatuak emakume profesionalaren erronka eta zailtasunen inguruan hitz egin zuen.

Emakumeen egoerak bilakaera handia izan duen arren, oraindik bide luzea geratzen dela aitortu zuen. “Ez naiz hain feminista”, adierazi zuen Lourdesek. Hala ere, jarrera bat azaldu edota proiektu bat defendatzerako orduan, emakumea izateagatik zailtasun gehiago izan dituela salatu zuen.

[Gehiago:]

 Emazte, ama eta etxekoandre on bat izan eta, aldi berean, aisialdirako denbora edukitzeko zailtasunez hitz egiterakoan, Arcoko zuzendariak honakoa adierazi zuen: “Gizonezkoak ez dira amilburuan hain erraz aurkitzen emakumeak bezala”. Horren arrazoia emakumeak “zaurgarriagoak” direla eta “erru sentimendu handiagoa” dutela adierazi zuen Lourdes Fernándezek.

Familia eta lana bateratu “Gogoeta eta aldez aurreko planteamendu falta dago - argitu zuen- gehienetan ez gara hausnartzen lan egiteak suposa dezakeen faktura pertsonalaz”. Izan ere, familia eta lana batera eramatea zaila egiten zitzaion galdetu ziotenean, intentsitatearekin ahalbidezkoa dela azaldu zuen. Aldiz, agian seme-alabei galdetu beharko litzaiekeela onartu zuen, zeren eta 14 urte dituen bere seme Martinek leporatu ohi dio ez dituela biak bateratzen.

Era berean, Donostiakoa izanik zergatik Madrilera lan egitera joan den galdetu ziotenean, bera Madrilera joan ez dela azaldu zuen; baina egia da astelehenetik ostiralera bertan dagoela. Emakumeak, batez ere, arte eta kulturaren barruan daudenaren pentsaera oso zabaldua dagoela jakinarazi zuen. Hori pentsatzen dutenei, ordea, aparteko emakumeak politika, zientzia, abokatutza eta beste arlo askotan aurki daitezkeela gogoratu zien.

Bestalde, unibertsitateetan ingeniaritza teknikoak ikasten dituzten nesken kopurua oso urria dela onartu zuen. “Hala ere, kopuru hori hazterakoan teknologia-iraultza bat egongo da”- agertu zuen Lourdesek barrezka. Lourdes Fernándezek emandako hitzaldiaz gainera, Donostian emakumeen nazioarteko egunaren inguruan ekintza ugari ospatu ziren. Esate baterako, erakusketak, zine-foroak, mobilizazioak, kirol jarduerak eta abar.