Idoia Iglesias | HERNANI

Hernaniko IV. Txistulari Topaketak ospatu ziren igandean eta amaiera bikaina izan zuen eguraldiak lagunduta.Giro ezin hobean ospatu zen igandean Hernanin izandako Txistulari Jaialdia. Eguraldia lagun izan zuten Plaza Berrin elkartu zirenek. Jende asko bildu zen bertan, batzuk dantzan, beste asko begira.

Beste behin ere ez zuen hutsik egin txistulariek jarritako festa giroak eta jendeak esker onez hartu zuen. Hernaniko bi txistulari taldekoek, Musika Eskolakoek eta Udalekoek, eta Euskal Herriko Txistulari Elkarteak antolatuta, herriko kale eta auzoak girotzen ibili ziren hainbat txokotatik etorritako txirulariak. Dianak eman zion hasiera goizeko 10:00etan Hernaniko IV.Txistulari Jaialdiaren azken egunari. “Asteburu bete-betea izan da txistularientzat eta baita gure inguruan mugitu direnentzako ere, eta gaur amaiera polita eman nahi diogu”, esan zuen Iñaki Egurenek, Hernaniko Musika Eskolako Txistulari Taldeko zuzendariak.

Musikariz bete zen Hernani igandean. Guztiak, txukun jantziak, Gudarien Enparantzatik irten ziren kalean behera. Durangaldeko, Pasaiako, Azkoitiko eta Hernaniko musikariek hartu zuten parte. Guztira, adin desberdinetako 40 txistu jole bildu ziren herria alaitzeko asmotan, eta egun osoa pasa zuten instrumentoa eskuetan zutela. Goiz-goizetik ekin zioten, beraz, txistu joleek beren lanari.

Hernaniar bat baino gehiago txistu doinuz esnatu zen. Goizeko hamarretarako herriko kaleetan barrena zebiltzan musikariak beren doinuekin. Argazki rallyko parte hartzaileek aukera paregabea izan zuten euren argazkiak ateratzeko, izan ere, Txistulari Jaialdia eta Argazki Rallya izan ziren protagonista pasa den asteburuan Hernanin.

Dantzaldia Plaza Berrin Musikariak nonahi zebiltzan: herriko plazan, alde zaharrean, eta baita herriko zenbait auzotan ere. 12:30 aldera, Plaza Berrin elkartu ziren eta festa giro ederra jarri zuten txistulariek. Jende asko bildu zen beren doinuekin dantzatzera. Patxi Apezetxea, Hernaniko Udal Txistulari Taldeko kidea, oso pozik agertu zen eta jendea dantzarako animatzen ere aritu zen: “Garai batean Hernaniko kioskoan igandero musika bandak jotzen zuen eta tarteka txistulariek, eta nolabait hori berreskuratu nahiko genuke gaur”.

Tenperatura onak ere asko lagundu zuen jendeak parte hartu zezan, izan ere asko eta asko izan ziren dantzara animatu zirenak. Andre batek honela zioen: “Sasoian banengo hortxe ibiliko nintzen ni ere dantzan, lehengo garaietan bezala”. Pasaiako Txistulari taldeko kide batek ez zuela horrelako harrerarik espero aitortu zuen, eta oso gustura zebilela ere esan zuen: “Hurrengo urtean errepikatuko dugulakoan nago”.

Dantzaldia amaituta, Santa Barbara Elkartera hurbildu ziren txistu joleak indarrak hartzera, arratsaldean ere festak jarraitzen baitzuen. Goizean eguraldia lagun izan bazuten ere, arratsaldean euri zaparradek ez zuten txistularien lana zapuztu. Herrian jai giroa jartzeko arazorik ez zien ekarri euriak eta berriro ekin zioten lanari tripak bapo bete ondoren. Kale Nagusian eta Kardaberaz Kalean ibili ziren gora eta behera kalejiran, ume, gazte eta helduak atzean zituztela.

Guztien aurpegietan ikusten zen oso ondo pasatzen ari zirela. Beste urte batez harrera bikaina izan zuen Txistulari Jaialdiak eta antolatzaileak oso pozik agertu ziren, eta bertaratu zirenek irrikaz itxarongo dute datorren urtekoa.