Bideo hau EiTBko profesionalek grabatu eta ekoitzi dute, baina ikusle batek eskatutakoa da.

Txinako antzinako tradizioa da taichia,duela urte batzuk oso modan jarri zen eta gure artean ere arrakasta izan du. Taldean egiten da goizeko lehen orduan edo arratsean, kanpoan eta hondar gainean oreka lortzea zailagoa bada ere, itsasoaren soinuak lagunduta, plazerra da.

Auzo desberdinetako hiritarrek kultur etxeetan izena eman dute, udan hondartzan ariketa fisikoak egiteko. Donostia Kulturak antolatu dituen kurtsoak dira. Astean behin Kontxako hondartzara jaisten dira taichi egitera.

[Gehiago:]

Maria Fernandezek, Donostia Kulturakoak, dioenez, "arrakasta handiarekin beteta ditugu plaza guztiak eta beti bi astetan betetzen dira ia gehienak. Normalean emakumeak dira eta 75-77 urteko jendea da. Itsasoaren doinuak lasaitasuna ematen du eta horrekin askoz hobe egiten duzu".

Gaur emakumeak bakarrik etorri dira, gehiago animatzen omen dira horrelako ekimenetara, baina gizonezkoek ere eman dute izena.

Olatuen joan etorriak erritmoa markatzen die eta taichia egiten inguruko energia bereganatzen saiatzen dira irakaslearen gidaritzapean. Hemendik kanpo dituzten arazo guztiak ahazteko ordua da. Konzentrazioa eta mugimendu motelak, horiek dira taichiaren oinarriak.

Itziar ikaslea da eta bere ustez "ezin da gehiago eskatu, ikusten dituzu gihar guztiak eta dena erabiltzen duzula. Goitik hasten zara eta beheraino, eta hori, nire ustez, oso inportantea da". Ariketak egiten eta, "oso ondo sentitzen naiz".

Zeure proposamena egin nahi baduzu, egin iruzkina blog honetan.