Mungia jendez bete zen “Bildumazaleen VI. Azokan”. Urtero gertatzen den bezala, Antonio Lopez, “Bitxikiak" Mungiako bildumazaleen elkartearen zuzendaria, oso urduri zegoen azoka inauguratzeko 10 minutu falta zirenean.

Izan ere, urte batean zehar prestakuntzak egiten egon ondoren azokaren eguna heltzeko irrikarekin zegoen. Aurtengo edizio hau oso jendetsua izan zen, zifra ofizialek diotenez 10.000 pertsona baino gehiago hurbildu ziren Mungiara.

Honi esker bertaratuek oso eroso bisitatu zituzten Mungian zehar zeuden erakusketa guztiak. Mungian barrena hiru gune nagusi bereizi ziren, Andra Mari elizako karpa, bertan jende pila batek haien bildumak elkartrukatzen zituzten. Bigarrenik Mungiako foru enparantzan bi karpa ezarri ziren salerosketa egin ahal izateko.

Erakusketei dagokienez, Mungiako frontoia, Agirre jauregia eta Torrebillela kultur etxean zehar banatuta zeuden. Frontoian sortu bezain laster jendearen joan etorria izugarria zen. Bertan itzelezko bildumak aurkitu zitezkeen, koloretsuak, zaharrak, klasikoak, umeentzakoak edo oso bitxiak zirenak. Hauen artean Nieves Urbanejaren kanpaitxoen edo Alfredo Gonzalezen labanen bildumak ziren aipagarrienak.

Frontoitik oso pozik irten ondoren bisitariak Agirre jauregian zegoen munduko bolen erakusketa ikustera joaten ziren. Bertan Roberto Herbosa bisitariak esan zuenez “bilduma ikusgarri, koloretsua eta oso ondo azaldua da hau”. Izan ere, Monik, munduko bolen bildumazaleak, gidatutako bisita bat egiten zuen, bola guztien historia ezagutu ahal izateko.

Baina bildumazaleen azoka honetan erakusketak ez ziren garrantzitsuenak, izan ere, aurtengo edizio honetan trukea eta salerosketa garrantzia hartu dutela azaldu digu Cristina Mayorek, "Bitxiak" bildumazaleen elkarteko kideak. Hau baieztatzeko ez zen salerosketako gunera joan baino gehiago behar.

Bertan jendearen joan etorria izugarria zen. Bertaratutakoen artean Zorione Bazterra, Ana Correa, Dani Espiga eta Javi Peña zeuden. Guzti hauek gauza bera esan zuten, bertan aurkitu ahal ziren materialak kalitate handikoak zirela.

Azkenik Andra Mari elizan zegoen trukaketa gunera jo beharra zegoen. Bertan sartu bezain laster 200 pertsona baino gehiago zenbatu zitezkeen, hauen artean, Miren Billelabeitia, euskarazko irakaslea, Jon Kortazar, idazle ezaguna, Begoña del Val, Xabier Salegi edo Marie Pierre eta bere Frantziako familia.

Azoka igandean, apirilak 13. Eguerdiko ordu bietan itxi egin zen, kritika oso onak jaso ondoren, izan ere, aurtengoa edizio erakargarria izan da, 60 bilduma baino gehiago, salerosketako 30 postu eta asteburu osoan zehar txistulariek eta trikitilariek girotu zuten urtero ospatzen den Bildumazaleen VI. Azoka.