Baserritar jantzia sustatzeko asmoz, Eibarko GASTE Elkarteak "Miss eta Mister Baserritarra I. Lehiaketa" antolatu du. Euskal jantzi tradizional bat jantzirik doan edonork har dezake parte.

Azaroaren 30ean izango da, San Andres egunean. Sariak:

-90 €ko txekea Eibarko Dendarien Elkarteko kide diren dendetan gastatzeko.

-Baserritar zapi erraldoia. -Txapela (mister) eta otarra (miss).

-GASTEko kideekin afaria.

Partehartzaile guztiek gabonetako otarren zozketan parte hartuko dute, eta sagardoa izango dute doan. Parte hartu barik, baserritarrez jantzita doazen guztiek txorizoa izango dute doan arratsaldeko 5,30etan.

Arratsaldeko 7etan, berriz, Kaikuren bainilazko irabiatuak banatuko dira. Arratsalde osoan zehar sagardo kupela egongo da plazan. Ekimen hauek Eibarko San Andres jaien baitan antolatu ditu GASTEk.

Informazio gehiago: http://www.sanandr.es

Sukabi dugu Otxarkoaga auzo bilbotarraren alternatiba eta pizgarri berria. Jai giroa lagun, abenduak 1ean, Ugarte Plaza parean kokaturik dagoen Sukabi Gazte Lokala aurkeztuko da eguerdiko 12:00etan. Ekitaldia, aurresku zein zuzeneko musikaren eskutik hasiko delarik.

Otxarkoagak badu zer ospatu larunbat honetan. Izan ere, leiho bako etxebizitza bi kultur iturri bihurtzekotan dira bertako gazteon ekimenez. Etxeko zein ingurukoen parte hartzea bultzatuz, ehundaka pertsona hurbilduko dira Sukabiri ongi etorria emateko asmoz.

Egitarauari dagokionez, musika ikuskizunak, herri bazkaria eta argazki erakusketa aipagarri dira. 14:30etan indabada herrikoia izango da gurean. Barazkijaleak betiere gogoan, bi menu izango direlarik eskuragai. Ikus-entzunezko zein musika emanaldiek girotuko dute lagunarteko bazkalostea. Azkenik, Alde Zaharreraino parranda poteoa izango dugu orkestrarekin batera.

Sukabi dugu Otxarkoagako Gazte Lokal autogestionatu berria, non dinamika, jarduera zein borroka guztiek bere txokoa duten. Hori dela eta, abenduaren 1ean burutuko dugun aurkezpenera gonbidatu nahi dugu euskal gazteria. Gazte, ospakizun erraldoi honetan parte hartzera atseginez gonbidatzen zaitugu. Etor hadi gurera!

Harremanetarako: sukabi@topagunea.com

Iurretako Gazte Asanbladako kideek gaur goizean egindako prentsaurrekoa bidali digute e-mail bidez. Lehendabizi, eskerrik asko.

Dena den, herritarrek euren txokoa badute gure artean eta horixe Zu Kazetari da, zure esku albisteak bidaltzeko jarritako tresna bat da honako hau.

Honako hau da Gazte Asanbladak bidalitako testua:

Gaur, apirilaren 29an, abadetxea erre zenetik ia 4 hilabete betetzen direnean, Iurretako Gazte Asanbladak udaletxeak gazteonganako izan duen jarrera salatu nahi du. Izan ere, udaletxeko zinegotzi bat bera ere ez da guregana etorri harremanetan jartzera. Eduki ditugun bilerak guk eskatutakoak izan dira, eta asko kostata emanikoak. Pasotismo itzelarekin, lehen batzarra egiteko eskaera sartu eta handik hilabete edo gehiagora hartu gaituzte udaletxean, batzuetan 3 eskaera berdin sartzeko punturaino iritsiz.

Pasotismoa eta jarrera negatiboa. Behin bilduta egon garenean, ez dugu ezer onik jaso. Gure eskaerei ezezkoa eman zaie, alkatearen ahotik entzun dugu ez digutela ezer emango, eta ez digute konponbiderik eskaini. Konponbide hau gainera, ez dugu guk bakarrik eskatu, 600 herritarrek baino gehiagok eskatu diote udalari firmen bidez.

Herriak esan du Iurretak gaztetxe bat behar duela. Izan ere, gaztetxe bat leku publikoa izan behar da gure ustez, eta beraz, leku publiko hori herriko administrazio publikoak eman behar du. Udalak, eskaerei itxaron beharrean, gazteentzako ekintzak eta azpiegiturak naturalki eskaini behar ditu.

Okupaziora behartuak. Soluziorik eman ez digutenez, okupatzera behartuak gaude. Txapisteria zaharrera sartu ginen, urteetan hutsik egondakoa eta udalak laster erosi beharrekoa. Desalojatu gintuzten eta epaitegitik ere pasa ginen. Orain frontoi alboko etxolan gaude, eta berriro ere salaketa bat dago gure kontra. Argi esan nahi dugu okupazioarekin ez garela eraikinen jabe egiten; eraikin huts hauek herriari zabaltzen dizkiogu.

Udalbatzako kideei eta batez ere alkateari jarrera aldatzeko eskatzen diegu.